សិស្សសាលាវិទ្យាល័យ ហ៊ុន សែន ប្រម៉ោយ ជាច្រើននាក់ដួលសន្លប់ ពុំដឹងមូលហេតុ

 

ពោធិ៍សាត់ ៖ សិស្សប្រុសស្រី នៃសាលាវិទ្យាល័យ ហ៊ុន សែន ប្រម៉ោយ ស្ថិតក្នុងឃុំប្រម៉ោយ ស្រុកវាលវែង ខេត្តពោធិ៍សាត់ ជាច្រើននាក់បានដួលសន្លប់ជាបន្តបន្ទាប់ ដោយពុំដឹងមូលហេតុ ត្រូវបានបញ្ជូនមកសង្គ្រោះបន្ទាន់ នៅមណ្ឌលសុខភាពប្រម៉ោយ។ ហេតុការនេះ កើតឡើងនៅព្រឹកថ្ងៃទី៣ ខែកុម្ភៈ ឆ្នាំ២០២៣នេះ។

ចំពោះករណីដួលសន្លប់នេះ លោកវរៈសេនីយ៍ឯង ធាង ឡេង អធិការនគរបាលស្រុកវាលវែង បានផ្តល់ព័ត៌មានបឋមថា ពិតជាមានសិស្សដួលសន្លប់មែន ហើយចំពោះករណីនេះ សមត្ថកិច្ច និងលោកអភិបាលស្រុក ព្រមទាំងមណ្ឌលសុខភាពប្រម៉ោយ កំពុងស្រាវជ្រាវរកមូលហេតុពិតប្រាកដ យ៉ាងណានោះ លោកនិងផ្តល់ជូននៅពេលក្រោយ។

យ៉ាងណាក្តីមកដល់ម៉ោងនេះ មិនទាន់មានសិស្សណាម្នាក់ គ្រោះថ្នាក់ដល់អាយុជីវិតនោះទេ ដោយមានការយកចិត្តទុកដាក់បំផុតពីឯកឧត្តមអភិបាលខេត្ត អាជ្ញាធរមូលដ្ឋាន សមត្ថកិច្ច និងជាពិសេសក្រុមគ្រូពេទ្យកំពុងធ្វើការសង្គ្រោះបន្ទាន់៕