www.ksapormean-khmerebooknews.com.kh
ភ្នំពេញ៖ គិតមកត្រឹមថ្ងៃទី៩ ខែមីនា ឆ្នាំ២០២៣ ការដ្ឋានសាងសង់ស្ពានខ្សែកាបកោះពេជ្រ-កោះនរា សម្រេចលទ្ឋផលបាន ៦២%ហេីយ។ តាមផែនការ គម្រោងនេះ នឹងបញ្ចប់ការសាងសង់នៅចុងឆ្នាំ២០២៣។ ស្ពាននេះ ជាការភ្ជាប់ចរាចរកណ្តាលរាជធានីភ្នំពេញ ទៅមកផ្លូវជាតិលេខ ១ ដែលនឹងជួយកាត់បន្ថយការកកស្ទះចរាចរណ៍លើស្ពានព្រះមុនីវង្សទាំង២។
មួយរយៈចុងក្រោយនេះ សង្កេតឃើញថា ចរាចរណ៍នៅក្នុងរាជធានីភ្នំពេញហាក់មានការតានតឹង ដោយសារផ្លូវចរាចរណ៍ធំៗមួយចំនួនមានការកកស្ទះខ្លាំង ប្រជាពលរដ្ឋជាច្រេីនមានការរអ៊ូរទាំដោយការធ្វើដំណើរទៅធ្វេីការ ទៅសាលារៀន និងដឹកទំនិញជួញដូរផ្សេងៗរបស់ពួកគាត់មានការយឺតយ៉ាវជាខ្លាំង។ មូលហេតុដោយទីតាំងមួយចំនួនកំពុងតែធ្វើការស្ថាបនាផ្លូវអាកាស និងធ្វើការជួសជុលផ្លូវ ជាដេីម។
ប្រជាពលរដ្ឋដែលធ្វើដំណើរឆ្លងកាត់ស្ពានច្បារអំពៅ បានលើកឡើងថា ពួកគាត់ធ្វើដំណើរឆ្លងកាត់ស្ពានច្បារអំពៅជាប្រចាំ តែមួយរយ:ចុងក្រោយនេះ ពិតជាមានការកកស្ទះនិងតានតឹងចិត្តយ៉ាងខ្លាំង ហេីយពួកគាត់បានទៅឆ្លងសាឡាងកោះនរាជំនួស តែពលរដ្ឋមួយចំនួនធំក៏ទៅឆ្លងនៅសាឡាងដែរ។ ការណ៍នេះ អាជ្ញាធរបានបន្ថែមសាឡាងរហូតដល់៤គ្រឿង ឃេីញថា អាចជួយចំឡងអ្នកដំណេីរបានលឿនជាងមុន។
ដោយសារតែកំណេីនប្រជាជន ក៏ដូចជាយានយន្តក្នុងរាជធានីភ្នំពេញ ពលរដ្ឋក៏បានដឹងថា ពេលនេះរាជរដ្ឋាភិបាល ក៏ដូចជារដ្ឋបាលរាជធានីភ្នំពេញកំពុងតែយកចិត្តទុកដាក់ធ្វើការសាងសង់ផ្លូវ និងស្ពានអាកាសព្រះមុនីវង្សបន្ថែមទៀត ដើម្បីកាត់បន្ថយការកកស្ទះ និងជួយសម្រួលការធ្វេីដំណេីររបស់ប្រជាពលរដ្ឋឆ្លងកាត់ផ្លូវជាតិ២ ផ្លូវជាតិលេខ ១ និងចំណុចផ្លូវ ៦០ម៉ែត្រ។ ការដ្ឋានសាងសង់កំពុងតែដំណេីការ ធ្វេីឱ្យផ្លូវមានការកកស្ទះ ប៉ះពាល់ដល់ការធ្វើដំណើររបស់ប្រជាពលរដ្ឋ ប៉ុន្តែពួកគាត់សង្ឈឹមថា ស្ពានខ្សែកាបកោះពេជ្រ-កោះនរាសាងសង់រួច នឹងជួយកាត់បន្ថយការកស្ទះបានខ្លះ។ កាន់តែប្រសេីរថែមទៀតនោះ នៅពេលស្ពានអាកាសព្រះមនីវង្សសាងសង់រួច សង្ឈឹមថានឹងមិនកកស្ទះចរាចរណ៍ទៀតទេ។
ដេីម្បីដោះស្រាយការកកស្ទះចរាចរណ៍នាពេលបច្ចុប្បន្ន រដ្ឋបាលរាជធានីភ្នំពេញបានបេីកកិច្ចប្រជុំពិភាក្សាដោះស្រាយការកកស្ទះចរាចរណ៍ នៅការដា្ឋនសាងសង់ស្ពានអាកាសព្រះមុនីវង្ស កាលពីថ្ងៃទី១ ខែមីនា ឆ្នាំ២០២៣ ដោយបានបានធ្វេីការណែនាំឱ្យក្រុមការងារបច្ចេកទេសធ្វើការប្រជុំពិភាក្សាបន្ទាន់ ដើម្បីរកដំណោះស្រាយចំពោះមុខដោយទទួលបានលទ្ធផលដូចខាងក្រោម៖
១. រដ្ឋបាលរាជធានីភ្នំពេញ បានណែនាំឱ្យក្រុមហ៊ុនសាងសង់ធ្វើការបង្រួមរបងហ៊ុំព័ទ្ធការដ្ឋានឱ្យបានតូចបំផុតតាមលទ្ធភាពដែលអាចធ្វើបាន ដើម្បីទុកលំហូរចរាចរណ៍បានធំ។
២. ស្នងការដ្ឋាននគរបាលរាជធានីភ្នំពេញ អធិការដ្ឋាននគរបាលខណ្ឌ និងអាជ្ញាធរពាក់ព័ន្ធ ត្រូវបន្ថែមកម្លាំងសមត្ថកិច្ចប្រចាំការ ដើម្បីជួយដោះស្រាយបញ្ហាកកស្ទះចរាចរណ៍នៅពេលចរាចរណ៍មមាញឹក។
៣. អំពាវនាវដល់ប្រជាពលរដ្ឋ ដែលកំពុងតែប្រើប្រាស់ចិញ្ចើមផ្លូវ សម្រាប់ធ្វើការតាំងលក់ ក្នុងការបម្រើឱ្យអាជីវកម្មលក់ដូររបស់ខ្លួន ត្រូវបញ្ឈប់ការប្រើប្រាស់ចិញ្ចើមផ្លូវទាំងនោះ។ ចំណែកប្រជាពលរដ្ឋអ្នកទិញទំនិញមិនត្រូវធ្វើឈប់ចតលើទ្រូងផ្លូវឡើយ ហើយសមត្ថកិច្ចនឹងធ្វើការចុះរៀបចំសណ្តាប់ធ្នាប់ ដោយចាត់វិធានការរដ្ឋបាលចំពោះអ្នកដែលនៅតែប្រើប្រាស់ចិញ្ចើមផ្លូវ ធ្វើការលក់ដូរ។
៤. មន្ទីរសាធារណការ និងដឹកជញ្ជូនរាជធានីភ្នំពេញ ត្រូវធ្វើការសិក្សាដាក់សាឡាង ដើម្បីឱ្យប្រជាពលរដ្ឋធ្វើដំណើរពីកោះនរា ឆ្ពោះមកតំបន់ជ្រោយចង្វារ (សណ្ឋាគាររ៉េស៊ីដង់សុខាភ្នំពេញ) បន្ថែមលើសាឡាងចម្លងពីកោះនរា ឆ្ពោះមកកោះពេជ្រដែលមានបច្ចុប្បន្ន។
៥. នៅពេលវលាចរាចរណ៍មមាញឹក ប្រជាពលរដ្ឋដែលមានលទ្ធភាព និងចេះប្រើប្រាស់ APP GOOGLE MAPSមេត្តាប្រើប្រាស់ជាជំនួយក្នុងការពិនិត្យមើលការកកស្ទះចរាចរណ៍នៅតំបន់ការដ្ឋានសាងសង់ស្ពានអាកាសព្រះមុនីវង្ស។ ពេលឃើញមានការកកស្ទះចរាចរណ៍ ប្រជាពលរដ្ឋប្រើប្រាស់ផ្លូវផ្សេងប្រសិនបើមានជម្រើស៕
0 Comments:
Post a Comment
kAbout www.ksapormean-khmerebooknews.com.kh