ឧត្តមសេនីយ៍ឯក ហ៊ុន ម៉ាណែត អញ្ជើញកាត់វិញ្ញាសារប្រឡង ជ្រើសរើសនាយទាហានជំនាន់ថ្មី នៃកងយោធពលខេមរភូមិន្ទ ឆ្នាំ២០២៣.!

នៅព្រឹកថ្ងៃទី៥ ខែមីនា ឆ្នាំ២០២៣ ក្រសួងការពារជាតិ បានបើកសម័យប្រឡងជ្រើសរើសនាយទាហានជំនាន់ថ្មី នៃកងយោធពលខេមរភូមិន្ទ ឆ្នាំ២០២៣, ដែលមានបេក្ខជនចំនួន ៦,៣៩៩នាក់ ក្នុងនោះមានបេក្ខជនជានារីចំនួន ២,៩៩៨នាក់ បានចូលរួមប្រឡងប្រជែងនៅតាមមណ្ឌលចំនួន៤ ក្នុងរាជធានីភ្នំពេញ។

ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង កងយោធពលខេមរភូមិន្ទ ជាមេបញ្ជាការកងទ័ពជើងគោក និងជាប្រធានអនុគណៈកម្មការប្រឡងជ្រើសរើសបានអញ្ជើញកាត់វិញ្ញាសារ

ប្រឡងជ្រើសរើសនាយទាហានជំនាន់ថ្មី នៃកងយោធពលខេមរភូមិន្ទ ឆ្នាំ២០២៣ នៅមណ្ឌលវិទ្យាល័យបាក់ទូក។

ឧត្តមសេនីយ៍ឯក ហ៊ុន ម៉ាណែត សូមជូនពរប្អូនៗបេក្ខជនទាំងជាង ៦ពាន់នាក់ដែលចូលរួមប្រឡងវគ្គនាយទាហានសកម្មជំនាន់ទី២៥ នាយទាហានទ័ពជើងគោកជំនាន់ទី១៣ នាយទាហានបន្តវេនជំនាន់ទី១៤ និងនាយទាហានបច្ចេកទេសយោធា នៅតាមមណ្ឌលទាំង៥ ក្នុងរាជធានីភ្នំពេញ អោយទទួលបានជោគជ័យ។

សូមបញ្ជាក់ថា គណៈកម្មការបានកំណត់យកនាយទាហានសកម្មជំនាន់ទី២៥ ចំនួន ១០០នាក់, នាយទាហានទ័ពជើងគោកជំនាន់ទី១៣ ចំនួន ១០០នាក់, នាយទាហានបន្តវេនជំនាន់ទី១៤ ចំនួន១៥០នាក់, នាយទាហានជំនាញបច្ចេកទេសយោធា ចំនួន៣០នាក់៕