www.ksapormean-khmerebooknews.com.kh
មណ្ឌលគិរី៖ ដើម្បីចូលរួមថែរក្សាប្រពៃណីទំនៀមទម្លាប់វប្បធម៌ ភាសាជំនឿសាសនា របស់បងប្អូនជនជាតិដើមភាគតិច នាព្រឹកថ្ងៃទី០៩ ខែសីហា ឆ្នាំ២០២៣ អាជ្ញាធរខេត្តមណ្ឌលគិរី បានប្រារព្ធពិធីអបអរសាទរទិវាអន្តរជាតិជនជាតិដើមភាគតិចពិភពលោក ៩ សីហា ខួបលើកទី២៥ លើពិភពលោក និងលើកទី១៩នៅប្រទេសកម្ពុជា ក្រោមប្រធានបទ” យុវជន ជនជាតិដើមភាគតិច គឺជាតួអង្គនៃការផ្លាស់ប្ដូរ ដើម្បីសិទ្ធិស្វ័យសម្រេច ”។
ពិធិនេះប្រារព្ធធ្វើឡើងដោយមានការចូលរួមពី លោក ណយ ស្រូន សមាជិកព្រឹទ្ធសភាប្រចាំភូមិភាគទី៨ លោក ចាន់ រតនា អភិបាលរងខេត្តមណ្ឌលគិរី និងមន្ទីរអង្គភាពពាក់ព័ន្ធ ចាស់ព្រឹទ្ធាចារ្យ ប្រជាពលរដ្ឋជាជនជាតិដើមភាគតិច មកពីបណ្តាក្រុង/ស្រុកទាំង៥ ក្នុងខេត្ត និងយុវជនជាច្រើនរូប ដែលប្រព្រឹត្តទៅនៅមជ្ឈមណ្ឌលវប្បធម៌ជនជាតិដើមភាគតិច ក្នុងភូមិដោះក្រមុំ សង្កាត់ សុខដុម ក្រុងសែនមនោរម្យ ខេត្តមណ្ឌលគិរី។ លោក ចាន់ រតនា អភិបាលរងខេត្តមណ្ឌលគិរី បានមានប្រសាសន៍ពាំនាំនូវការនឹករលឹក និងការផ្តាំផ្ញើសួរសុខទុក្ខពីសំណាក់ សម្ដេចអគ្គមហាសេនាបតីតេជោ ហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវកិត្តិព្រឹទ្ធបណ្ឌិត ដែលជានិច្ចកាលលោកទាំងពីរតែងតែគិតគូរពីជីវភាព សុខភាព សុវត្ថិភាព និងសេចក្តីសុខរបស់បងប្អូនប្រជាពលរដ្ឋនៅទូទាំងព្រះរាជាណាចក្រកម្ពុជា ជាពិសេសបងប្អូនជនជាតិដើមភាគតិច។ លោកអភិបាលរងខេត្ត លើកឡើងថា របត់សង្គមបច្ចុប្បន្នបានផ្លាស់ប្តូររបៀបរស់នៅរបស់មនុស្សទូទាំងសាកលលោកខណៈបច្ចេកវិទ្យាបានផ្សារភ្ជាប់ក្នុងជីវិតប្រចាំថ្ងៃមិនអាចខ្វះបានតែទោះជាយ៉ាងណាជនជាតិភាគតិចនៅខេត្តមណ្ឌលគិរីនៅតែរក្សាប្រពៃណីទំនៀមទម្លាប់វប្បធម៌ពួកគាត់ និងយកមកអនុវត្តជារឿយៗ។
ក្នុងឱកាសនេះដែរ លោក ណយ ស្រូន បានបញ្ជាក់ថា ការប្រារព្ធពិធីនេះឡើង គឺសំដៅរួមចំណែកលើកកម្ពស់តម្លៃ សីលធម៌ វប្បធម៌ប្រពៃណី ដ៏ល្អផូរផង់ និងដើម្បីបង្ហាញឲ្យឃើញថា រាជរដ្ឋាភិបាល បាននិងកំពុងយកចិត្តទុកដាក់ទៅលើបងប្អូនជនជាតិដើមភាគតិច ក្នុងការផ្ដល់ឱកាស និងសិទ្ធិសេរីភាព ការបញ្ចេញមតិយោបល់អភិវឌ្ឍប្រទេសជាតិ។ លោកក៏បានអំពាវនាវដល់អាជ្ញាធរគ្រប់លំដាប់ថ្នាក់ និងអង្គការដៃគូ សហគមន៍ និងប្រជាពលរដ្ឋទាំងអស់ ត្រូវចូលរួមសហការគ្នាថែរក្សា ការពារប្រពៃណីទំនៀមទម្លាប់ ជំនឿ សាសនា វប្បធម៌ អត្តសញ្ញាណ របស់បងប្អូនជនជាតិដើមភាគតិច ប្រកបដោយនិរន្តរភាព ការអភិវឌ្ឍសេដ្ឋកិច្ចនៅក្នុងតំបន់ដែលបងប្អូនរស់នៅ៕
